أنا في العادي مبحبش أتاقل على حد بس في الموضوع ده بالذات اسمحولي أتاقل عليكم , في ذكرى ميلاد الأسطورة " والدي".
# أسطورتي
#البوب الكبير
#والدي
د.أمين
(7/1/2010- 31/1/1948)
يقال اذكروا محاسن موتاكم ,بس مع رحيل هذا الرجل كنت بدورله على مساوئ أو أي حاجة تهون عليا فراقه, وتريحني من صداع البكا .
لكل منا أسطورته و اسطورتي كانت الراجل الراحل ده.
ببساطة علمني : الضحكة على وشي ,
الفكرة في دماغي
النصيحة في وداني
, الكلمة على لساني ,
الرؤية في عيني,
الخير في ايدي
, السعي في رجلي
علمني حب الناس في قلبي
وعلمني برضه الشدة في الصعاب
,علمني الاختيار في المفارق مغارب و مشارق,
علمني الانسانية
علمني الخلاصة " كان برنس بيجيب من الاخر"
علمني كل كلمة أو خصلة حلوة بتفكر فيها دولقتي و انتا بتقرا
علمني أبقى "أنا" بس نعيش "احنا".
ولما مات علمني أعظم درس
علمني" ماهية الحياة "
أفتقدك بشدة
شكرا يا بوب
* ياريت كل اللي عنده أسطورة ياخده حضن أخطبوطي و يديله بوسة تطرقع و يسمع صداها الجيران
احنا كنا بنهريه بوس زي العيال كبرت و كل واحد يقول " أبويا يا جدع " , كنا مصايب مش عارف استحملنا ازاي.
قررت أعمل السنوية يوم ولادته لأنه يوم فرحت بيه من غير ما اشوفه و ممكن أخده يوم أجازة رسمي احتفالا بالأسطورة "كويس انه جه يوم جمعة "
مهما قلت و عملت مش هوفيه حقه , ممكن أبقى ولد صالح يدعو له بمساعدتكم
أسألكم صالح الدعاء بأي لغة , و قراءة جزء أو ما تيسر من القران الكريم.
ولا أراكم الله مكروها في عزيز لديكم
No comments:
Post a Comment